Մայր Աթոռ Սուրբ Էջմիածինը դատապարտում է Շիրակի թեմի առաջնորդ Միքայել արքեպիսկոպոս Աջապահյանի առնչությամբ Վերաքննիչ քրեական դատարանի հունիսի 30-ի որոշումը, որով կալանքը կիրառելու մասին սկզբնական դատական ակտը թողնվել է ուժի մեջ։
Մայր Աթոռի տեղեկատվական համակարգի տարածած հայտարարության համաձայն՝ «առաջին ատյանի դատարանը 2025թ. հունիսի 28-ին Տ․ Միքայել արքեպիսկոպոս Աջապահյանի նկատմամբ կալանքը կիրառել էր գործի քննությանը խոչընդոտելու և հանցանք կատարելու մտացածին հիմնավորումներով»։
«Միքայել արքեպիսկոպոս Աջապահյանին անազատության մեջ պահելը խոսքի ազատության սահմանափակմանն ուղղված պատժողական գործողություն է և ուղղակի հետևանք իշխանության եկեղեցահալած քաղաքականության և եկեղեցականների դեմ ատելության խոսքի», - պնդում է Մայր Աթոռը՝ հորդորելով «դատական և դատախազական մարմիններին անհապաղ ազատ արձակել անհիմն կալանավորված Տ. Միքայել արքեպիսկոպոս Աջապահյանին»։
Միքայել արքեպիսկոպոսին իշխանությունը զավթելու կոչի հոդվածով մեղադրանք է ներկայացվեց նրա մեկ տարվա վաղեմության մի հարցազրույցի հետքերով, որտեղ բարձրաստիճան հոգևորականը խոսել էր հեղաշրջման անհրաժեշտության մասին:
